Кудымкарскöй лесотехническöй техникумлö тырис кыкъямысдас вит год

Порйöтны юбилей техникумлöн залö öксисö ветераннэз, велöтiссез, челядь да гöссез. Галина Вячеславовна Девяткова уджалiс татöн куимдас годся унажык. Техникумлöн успехöн пыр лыддис уджалан коллектив. Сiя татöн вöлi пыр вына да творческöй. Эд чулалöм годдэзö техникумын лöсьöтiсö крайлöн промышленность да экономика понда дас тысячася унажык специалистöс. Оз кольö бокö бытшöм традицияэз и öнi.

Бöрья кадö техникумын бурланьö вежсис уна мый. Таво татöн оссис прикладнöй квалификацияэз сьöртi многофункциональнöй центр, кытöн велöтöны уджавны хорвестеррез да форвардеррез вылын.

Талун педагогическöй коллективын уджалöны уна ученöйез. Нiя сетöны челядьлö современнöй да востребованнöй знаннеэз. Техникумын пизьö спортивнöй да культурно-массовöй олан. Челядь бытшöма мыччалöны асьнысö быдкодь мероприятиеэз да вермасьöммез вылын.

Юбилейлöн торжественнöй тор вылын леснöй техникумлöн заслугаэз йылiсь баитiсö велöтiссез, ветераннэз да официальнöй гöссез.

Бытшöм удж понда местнöй властьлöн представителлез наградитiсö велöтiссезöс благодарственнöй письмоэзöн да грамотаэзöн.